Los sindicatos docentes caltienen la fuelga énte la "zarrazón ensin llendes" d'Espina

Fran Rey asegura que "a vegaes, l'actitú más agresiva ye la pasiva" y que, de nun dialogar, Espina llevará al sector educativu a una situación "irreversible"

Los sindicatos CCOO, UXT, Suatea y CSIF caltienen la xornada de fuelga programada pal 10 de setiembre, fecha d’entamu del cursu escolar viniente, énte la "zarrazón ensin llendes" de la conseyera d’Educación, Lydia Espina, de nun entamar una negociación col comité de fuelga que faga posible la desconvocatoria d’esti paru.

Nuna rueda de prensa a comuña, les organizaciones sindicales reprocharon a la titular d’esti departamentu la so negativa a dialogar col comité de fuelga cuasi dos meses dempués de facer l’anuncia de convocatoria de fuelga na enseñanza pública.

Según esplicaron, el paru del día 10 nun se plantega por "ilusión", sinón porque los docentes asturianos necesiten una "meyora de les condiciones llaborales que lleven 23 años esperando", solliñó Jorge Caro, de CSIF.